Интервью

Январь 2020
Дү Ше Ша Бе Жу Иш Же
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31    
02/08 12:40
 

Гуннар Виганд: Донор шериктештиги Кыргызстанды карызга батыруу максатын көздөбөйт


 

БИШКЕК, 2-август. (“КАБАР”). 2010-жылдын 27-июлунда Бишкекте өткөн донорлордун форумуна көп эл аралык уюмдардын өкүлдөрү чогулушту. Атайын келишкен меймандардын арасында Евразиянын Чыгыш Европа, Түштүк Кавказ жана Борбордук Азия боюнча директору Гуннар Виганд да болду. Ал форумга гана катышпастан, конференцияда айтылгандарды өз көзү менен көрүп чыгуу үчүн Кыргызстандын түштүгүндө болду.

 

-Ошто болуп, жергиликтүү тургундардын коопсуздугун камсыз кылууну сиз кандайча бааладыңыз?

 

-Ал жерде өзгөчө абал киргизилгендиги жана коменданттык саат иштеп жаткандыгы абалдын дурус эместигин айгинелеп турат. Мен Оштун көп тургундары чочулоо менен жашап жатышкандыгын көрдүм. Кырдаал жакында калыбына келе тургандыгына үмүттөнгүбүз келет.

 

-Евросоюз республикага 118 миллион евро бөлүп берет. Бул каражаттар кандайча бөлүштүрүлөт?  Донорлордун конференциясында жалпысынан гана айтылды, эч ким бул суроого так жооп берген жок.

 

-Ооба, 118 миллион евро Кыргызстандын 2010-жылдан 2013-жылга чейинки кыска мөөнөттүү жана узак мөөнөттүү муктаждыктарын колдоого жумшалат. 12 миллион евро социалдык туруктуулукту чыңдоого жана гуманитардык жардам көрсөтүүгө багытталган жаңы демилгелерди каржылоого багышталган. ЕСтин программаларынын алкагында үстүбүздөгү жылы 55 миллион евро социалдык коопсуздукту, билим берүүнү жана айыл чарбасын колдоого бөлүнөт. 2011-жылдан 2013-жылга чейин социалдык коргоо, билим берүү жана мыйзамдын үстөмдүгү чөйрөсүндөгү реформаларды улантууга бөлүнмөкчү.

 

-Кандай ачык-айкын долбоорлор ишке киргизилет же кайсылары иштеп жатат?

 

-Азыр Евросоюз Кыргызстандын түштүгүндөгү адамдарга убактылуу үй-жай берип туруу боюнча БУУнун Качкындардын иштери боюнча Жогорку Комиссарынын башкармасына жардамдашууда. Бул биз тараптан каржыланып жатат. Долбоордун идеясы адамдарга убактылуу турак-жай, кыштан өтүп чыгышы үчүн дубал жана чатыр берүүдө турат. Дагы бир “Иштин ордуна акча” деген демилге Ош менен Жалал-Абадда иштеп жатат. Анын мааниси биз шаарларды тазалап чыгуу үчүн жумушсуздарды жалдай тургандыгыбызда. Ошто болуп, бул долбоордун иштеп жаткандыгын көрдүм: жаш адамдар атайын кийим кийип алышып көчөлөрдү тазалап жүрүшүптүр.

 

-Азыр 2,2 миллиард доллардан ашып кеткен тышкы карызын Кыргызстандын төлөп берүү мүмкүнчүлүгүн кандай баалайсыз, анын бир  бөлүгү кредит түрүндө бөлүнө турган ушунчалык зор көлөмдөгү жардам суроо менен биздин өкмөтүбүз кезектеги катачылыкты жасабайбы?

 

-Өткөн форумда Кыргызстандын жетекчилиги жардамдын бир бөлүгү донорлор тарабынан гранттар же концессиялык негиздеги кредит түрүндө бөлүнүшүн сурады. Мен донорлор бул чакырыкты угушат деп ойлоймун. Донор шериктештиги Кыргызстанды бересеге батыруу максатын көздөбөгөндүгүнө сизди ишендирип кетүүгө тийишмин. Мен ЕСтин бүткүл жардамы гранттык негизде гана бөлүнө тургандыгын баса көрсөтө кетким келет. (Которгон Ж.Т.)

 

                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                     


Бөлүшүү

  • print
  •  Facebookта жайгаштыруу
  • Twitterде жайгаштыруу
  • Контактка жайгаштыруу
  •  LiveInternetке жайгаштыруу
  • Одноклассниктерге жайгаштыруу
  • LiveJournalда жайгаштыруу
  • Мой Мирге жайгаштыруу